Awan kuwe nang sekolahan Bu Guru Kartinem agi ngajar.Deweke agi takon maring murid-muride jan-jane pada duwe cita-cita apa angger wis padha gede ngemben.
"Miki bu guru kan wis nerangna wong-wong hebat nang dunya, kaya Bung Karno, Albert Einstein, Ngasi Maradona, siki jajal ibu takon angger wis gede ko padha kepengin dadi apa," Bu guru Kartinem nerangna nang ngarepe murid-muride.
"Jajal kowe Tagluk, ko nduwe cita-cita apa," Bu Guru Kartinem takon.
Ditakoni kaya kuwe Tagluk meneng sedela banjur semaur. "Anu inyong kepengin pinter ngaji ben ngemben dadi ustad sing terkenal nang tivi-tivi," Tagluk semaur.
"Wah apik banget cita-citamu," Bu Guru Kartinem katon seneng.
"Jajal ko Katung, ko cita-citane apa," Bu Guru Kartinem nunjuk Katung.
"Inyong kepengin dadi petani sing sawahe omber ben panene akeh banget," Katung semaur.
"Kuwe ya cita-cita sing luhur," Bu Guru Kartinem takon maring Juminten.
"Nek inyong ya bu kepengin dadi wong sing sugih, mengko duite inyong sing akeh banget nggo nyenengna wong tuaku, bojoku, karo anakku, pokoke duite inyong sing akeh banget kuwe arep nggo seneng-seneng karo bojokulah," Juminten gole semaur semangat banget.
Olih wangsulan kaya kue Bu Guru Kartinem keton bungah ngasi aweh jempol maring juminten. "Angger kaya kuwe, kowe jenenge wong wadon sing bekti maring wong tua karo bojo,apik banget kuwe, tapi nek arep sugih kude pinter karo rajin nabung,"
"Nah siki kowe Betur cita-citamu apa," Bu Guru Kartinem takon maring Betur sing njagong nang mburi ne Juminten.
Ditakoni kaya kuwe Betur semangat banget gole semaur.
"Cita-citaku kawin karo Juminten Bu," Betur semaur seru banget.
"Owalah bocah senenge koh nunut mulya tapi ra gelem kesel, dasar Betur," Bu Guru Kartinem mbatin raine keton kecut.(*)
Tidak ada komentar:
Posting Komentar